Estufa de orixe francesa (zona oriental) ou italiana (noroccidental), en barro cocido e esmaltado en branco, policromado a pincel a imitación das cualidades do mármore veteado. Con forma troncopiramidal invertida e abalaustrada, o corpo vai cortado a chafrán nas esquinas, rematadas á altura da boca do recipiente cunha tarxa vexetal coroada por cadanseu mascarón de león de boca calada. Tapa moldurada e extraíble. Conta con dúas asas laterais aseguradas ao interior mediante parafuso. Van en ferro con mango en madeira torneada. Esta chauferette conta con sete orificios, catro nas bocas correspondentes aos leóns, e tres na parte inferior. No seu interior depósito en ferro de forma troncocónica para a leña. Na base, na cara exterior, o número de serie: 42. Na tapa, outro número de serie: 52.
