Gravado da casa L. Turgis que representa unha escena do Inferno; coa inscrición: "Apartaos de mi malditos al fuego que está aparejado para el diablo y para sus ángeles", lema incluído no Catecismo para os Párrocos do Concilio de Trento. Marco en madeira.
Gravado da casa L. Turgis que representa unha escena do Purgatorio e inscrición:"Nadie entrará en el reino de los cielos si no ha sido purificado de antemano", lema incluido no Catecismo para Párrocos do Concilio de Trento. Marco en madeira.
Abano pregable de 14 variñas e dúas gardas. Talladas en marfil con incrustacións de motivos florais. País en pluma de avestruz negras unidas por fío, coma os aanos de baralla.
Óleo sobre lenzo, retrato ovalado de dona Águeda López Vieites, muller de Diego de Andrés García, nai entón de Ramón de Andrés García-López, bisavoa polo tanto de María Paz Taboada. Executado por Román Navarro a partir dunha fotografía daquela muller conservada no arquivo fotográfico do Pazo de Tor. Dedúcese que o retrato foi froito dun encargo levado a cabo no taller coruñés a través do intercambio postal. O marco, en madeira e estuco dourados, é ovalado con decoración de contas esféricas e entramado xeométrico. A modelo sitúase de tres cuartos e lixeiro perfil, o que, aínda sen proclamar fondura sicolóxica, aporta naturalidade, soportada tamén na veracidade do debuxo, na pincelada, moi fluída, e no tratamento lumínico.
Armario de planta rectangular que se utilizaba para gardar xergóns de lá. Labrado en madeira de castiñeiro, conta con dúas portas na súa cara frontal talladas cun gran cuarterón resalteado, tallado a bisel, e outro panel inferior como sinxelos motivos ornamentais, nunha disposición que ritma o lenzo, enteirizo e ensamblado a cravo, e que se repite nos laterais. O cornisamento, co seu entaboamento moldurado, é lixeiramente voado. Salienta o faldón ondulado, con maior volume na onda central, e que serve de unión aos catro pés que soportan a estrutura. Conserva a súa pechadura orixinal en ferro. No interior tres baldas corredeiras.
Butaca con dous apoiabrazos. Asento acolchado en veludo en tons granates e ocres e apoiado en catro patas, as dianteiras de lixeiro perfil de sabre e unidas en chambrana. Pala trapezoidal, calada, con travesaño central.
Moble buró escritorio en madeira de castiñeiro con dous corpos: o inferior consta de cinco caixóns; o superior, retranqueado e con tapa frontal abatible, con seis pequenos caixóns no interior, pintados en tons verdes e algún deles con secreters.
Palanganeiro en madeira de faia con espello na parte superior e almofía en louza branca. Nos laterais dous saintes para colgar toallas, do tipo que producía Thonet (vid. Nº 924)
Xerra para almofía en cerámica branca con asa e decorada con motivos florais (rosas), coa súa correspondente estrutura soporte, en madeira de faia, recurvada, ao xeito dos mobles hixiénicos que facía Thonet (peza 924 do inventario).
